قصه تبكى جهل الاهل
النهارده الصبح راكن عربيتى وواقف على البحر
سرحان فى ملكوت الله
لقيت راجل و مراته و معاهم طفل تقريبا 4 او 5 سنين
الراجل بيزعق لمراته و هى بترد على زعيقه بزعيق و ماسكه فى إيديها الولد
طبعا انا مش سامع .. لكن شايف اللى بيحصل
فجأه لقيته بيزقها
و هى ما كدبتش خبر و سابت ايد الولد و ضربت جوزها بالقلم
الولد فى اقل من ثانيه جرى على الشارع خبطته عربيه
نزلت جرى من العربيه و رحت اشوف الولد
للأسف توفاه الله
الراجل من ذهوله بأه واقف بيلطم و يقول اعملوا فيا خير و موتونى
الست اترمت على الأرض و بتتمرغ فى دم ابنها
انا و الناس بنبعدهم و واحد قلع الجاكيت و غطى الولد
_____________________________________________________
رجعت عربيتى و قعدت اعيط و اقول لنفسى
ياترى ربنا عمل كده علشان ينقذ الولد ده من ابوه و امه !!
و للا علشان يبتلى الاب و الام دول !!
و للا علشان كل اللى حضروا المشهد ده يتعظوا !!
و للا علشان كل ده سوا
و لقيت سؤال بيفرض نفسه عليا
يا ترى فى كام طفل مات و هو عايش بسبب خلافات ابوه و امه ؟
و فى كام اب و ام اخذتهم العزة بالأثم و ضحوا بأبنائهم علشان يرضوا انفسهم
و كام و كام و كام ......
ياااااااااااا رب
اهدى كل اب و كل ام
يااااااااا رب
اصلح ذات بين الازواج
يااااااااا رب
جنبنا شياطين انفسنا و شياطين الإنس و الجن و كل من يكون عون على خراب البيوت
آسف لإزعاجكم
آسف للإطاله
آسف لكل من اوجعته
و مسامح كل من اوجعنى بقصد او بدون
الصلاة على النبى
ليست هناك تعليقات:
إرسال تعليق